ENT Medical - Halqumning qon bilan ta'minlanishi, limfa oqimi va innervatsiyasi

Halqumning qon bilan ta'minlanishi, limfa oqimi va innervatsiyasi

Halqumni tashqi uyqu arteriyasining shoxchasi – yuqoriga koʻtariluvchi halqum arteriyasi (a. pharyngea ascendens ), yuz arteriyasi shoxchasi – yuqoriga koʻtuvchi tanglay arteriyasi (a. palatina ascendens), uyqu arteriyasining oxirgi shoxchasi – yuqori jagʻ arteriyasi shoxchasi – a. palatina descendens, uning pastki boʻlimlarini asosan a.thyreoidea inferior (chap tomonda a. subclavia shoxchasi, oʻng tomonda truncus brachiocephalicus) qon bilan taʼminlaydi.

Halqum venalari old va orqa halqum chigalini (plexus pharyngeus anterior et posterior) hosil qiladi. Ular yumshoq tanglay va halqumning orqa va yon devorlarining tashqi yuzasida joylashgan boʻlib, vena qoni ichki buyinturuq venasiga (v.jugularis interna) quyiladi.

Halqumdan limfa chuqur va orqa boʻyin limfa tugunlariga oqib tushadi. Halqumning limfadenoid tuzilmalarida, shu jumladan barcha murtaklarda limfa tomirlar boʻlmaydi.

Halqum oʻrta qisuvchi mushagining tashqi va ichki yuzalarida nn. glossopharyngeus, vagus et sympathicus shoxlaridan hosil boʻlgan halqum asab chigali (plexus pharyngeus) joylashgan. Bu chigal halqumning harakat va sezuvchanlik innervatsiyasini taʼminlaydi. Halqum yuqori qismining harakat innervatsiyasini asosan tilhalqum asab tolasi, oʻrta va pastki qismlarining innervatsiyasini sayyor asab tolasining shoxchasi – qaytuvchi hiqildoq asab tolasi (n.laryngeus reccurens) taʼminlaydi. Halqumning sezuvchanlik innervatsiyasini yuqori qismida n.tigeminusning II shoxchasi, oʻrta qismida – n.glossopharyngeus shoxchalari va pastki qismida – n.vagus ning yuqori halqum asab tolasining yuqori shoxchasi taʼminlaydi.